મહાસાગરને ઝૂલે ઝૂલતી ને ઝુલાવતી :
ન્યુ પૉર્ટ વૉક-વે, સામે પાર ન્યુ યૉર્ક વૈભવી!
એમ્પાયર સ્ટેટ બીલ્ડીંગે ત્રિરંગાના પ્રકાશમાં
સ્વતંત્રતા દિને લીધો મને સ્વબાહુ પાશમાં!
ટ્વીન ટાવર પોઢેલા સારસ-સારસી સમા
અટૂલું એકલું ઊભું વર્લ્ડ ટ્રેડીંગ કેંદ્ર ત્યાં!
ગાઢ આલિંગને ઝૂમે શ્વેત-અશ્વેત બેલડી;
શ્વેતસુંદરને ચૂમે અધરે શ્વેત સુંદરી!
સ્મિત સૌંદર્ય સંચારે હિલ્લોળે આંખ આંખમાં
ગર્વીલી ભારતી ઘૂમે પરોવી હાથ હાથમાં!
અમીરોની ખુમારીની જોઈ મેં કરુણાંતિકા :
અલ્પાતિઅલ્પ વસ્ત્રોમાં મ્હાલતી કૈં અમીરિકા!
શકય છે મેડમો માટે ઉનાળો આકરો વધુ
કે પ્રથા જ અહીં એવી-યથા ઈચ્છસિ તથા કુરુ!
શેઠને પેટ દોરે ને PETને શેઠ દોરતા;
દેશ છે સ્વચ્છતાનો આ – કરાવે વેઠ PET જયાં!
જર્સી સીટી, ન્યુ પૉર્ટમાં હડસન નદીના વૉક-વે પર: ન્યુ પૉર્ટમાં હડસન નદીના વૉક-વે પર (કદાચ અમેરિકામાં બધે જ), થોડા થોડા અંતરે, pet એ કરેલી ગંદકી સાફ કરવા માટે પ્લાસ્ટીકની કોથળીઓ અને પાસે તેના નીકાલ માટે બાસ્કેટ હોય છે. Pet નો મળ (મૂત્ર નહીં) સાફ કરવો ફરજિયાત છે.