આ મોજીલા મંદાનિલની સા રે ગ મ પ ધ ની… સરતી
ને મસ્તીલા ઝરમરિયાની પ ધ ની સા સા રે… ગમતી;
રૂપાવરણી મેઘકિનારી સોનવરણ થઈ ઝળહળતી :
સુમિરન કર લે મનવા, દુઃખમાં સુખની સા રી ગ મ પ ધ ની!
અસ્ત સમય અવ સવિતાનલ, જલ-શીતલ રંગ અનંગ રહી
કો અકડેલી કોયલ ટહુકે ટહુકે રસ લઈ અવતરતી;
ટહુકે આ તટ, અવર તટે ટહુકારે બે તટ મેળવતી
સાદ કરે ઋતુને વરસાદી અકળિત સકળ નિસર્ગવતી!
ડુંગર ડુંગર વાદળ, આગળ પાછળ મોસમ મઘમઘતી,
આ સરિતા જળ ખળખળ, હર પળ શીકર થઈ હળતી મળતી;
પટમાં ખડક અડગ બગ-પગમાં તૃપ્તિ પરસ થઈ સળવળતી;
ચકલી કાબર કાગ કબૂતર કલકલિયે કુદરત કવતી!
આ તરુવર, પલ્લવવર, પલ્લવનસવર, નસ નસ રસ ઝરતી,
પરગટ સરગમ સોડમ – ટળવળતી ધરતીને કળ વળતી!
આ જીવન વન, તન ઉપવન, મદમન મધુવન, પળપળ પાંગરતી,
કણ કણ કંઠ કવન, વંદન હે કરુણા અમ અંતરતમની!
પૂનામાં મૂળાને કિનારે