અઢારે પચ્ચીસે સહજીવનના તંતુવચને
તમે સંધાયા એ અવસર – મને પંદર હશે;
હથેલીની રેખા પ્રતિકૂળ છતાં મક્કમ રહી
વિધાતાના લેખો અદલ બદલી ષષ્ટિ સરજી!
બધા સંબંધોમાં કવચિત ભરતી ઓટ દીસતાં;
તમારાં હૈયાંમાં સતત રસ અન્યોન્યમયતા!
સુભાગ્યે સૌભાગ્યે સહચરણનાં સાઠ વરસોઃ
હવેનાં વર્ષોમાં વિભુવરકૃપાવૃષ્ટિ વરસો!
મને રે યાદા’વે અવર ભગિની સ્નેહતરસી,
સુનામીમાં ઝૂઝી બ્લડ-સુગરની, કિંતુ ન રહી!
તમે બંને બ્હેનો પરિણીત થયાં એક જ દિને;
હતે જો આજે એ પણ અતીવ ઉલ્લાસિત હતે!
પ્રભો! સૌ ભાઈને પુનિત કરજે બ્હેન દઈને :
મળ્યો કેવો દૈવી મધુરપભર્યો સ્નેહ મુજને!