આ જીવન સુંદર છે!
ઉર-પથ્થરથી ફૂટી નીકળે રમ્ય પ્રેમનું ઝરણું :
શ્યામલ શશના ગૌર હાસ્યમાં શરદ પૂર્ણ ચાંદરણું;
આ અનુકૂલ અવસર છે –
આ જીવન સુંદર છે!
અલ્પ વર્ણની વર્ણમાલિકા : મહાકાવ્ય અવતરતું :
સ્વલ્પ વર્ણની કાવ્યપંક્તિમાં નવચેતન તરવરતું;
તન વ્યંજન, મન સ્વર છે –
આ જીવન સુંદર છે!
પલ પલ પર્વ-અસર છે :
સુંદર સુંદરતર છે!
જવ સમદર પર સૂર્ય નવોદિત અદ્ભુત કંઈ ઉદ્ભવતું :
ક્ષિતિ-નભ-વાયુ-અગન-જલ સંગમ-પંચતત્ત્વ પાંગરતું;
એ જ બ્રહ્મ-હરિ-હર છે
આ જીવન સુંદર છે!
પલ પલ પુણ્ય પરમ છે :
સુંદર સુંદરતમ છે!
આ જીવન સુંદર છે!