અગનિની સાખે લગનીએ લગન કરાવ્યાં :
ભાઈ અને બ્હેનીની વચ્ચે ભાભી આવ્યાં!
મહિયર – માતપિતા, ભગિની ને માડીજાયો,
સહિયર, સ્વજન, પળેપળ, ફળિયું – સંગ ભુલાયો!
નવ મૌક્તિકની માળ – યથાવત્ રહી સ્વસ્થાને
બ્હાર બિરાજ્યાં જેમ પ્લુટો; વૈજ્ઞાનિક જાણે!
જળનો દેહ ધરી નવપાત્રોના મેળામાં :
જેવા ઘાટ મળ્યા – આનંદે મહીં શમાયા!
ધરતી ને સૂરજની વચ્ચે ગુપ્ત ચંદ્રમા :
ભાઈ અને ભાભીની વચ્ચે બ્હેની આવ્યાં!
નહી ભાભી, નહિ બ્હેની; ભાઈ હશે ભરમાયાઃ
તાણા ને વાણાની વચ્ચે ટોણા આવ્યા!