`સાવ સળેકડા એકડા’ જેવી ગૌર ગૌરવી ગુડિયા :
અંતરતમમાં ગલગલિયાં જવ વ્હાલ કરે ગુલગુલિયા!
ભણતર કરતાં ગણતર ઝાઝું, ચાલન કરતાં નર્તન :
શું રે વખાણું ગાયન, વાદન, વાણી કે તવ વર્તન!!
નથી કળાતું કે ચઢિયાતું ઉમ્મર કરતાં ડહાપણ :
`જઈએ દર્શન કરવા?’ – તારી ગમતી હા પણ, ના પણ!
સ્વર-વ્યંજનની હ્રસ્વ-દીર્ધ ભુલભુલામણીમાં ભટકે :
છટકે કમાન પેન્સિલ તી…ણી કરતાં જો અણિ બટકે!
લખવા કરતાં ભૂંસે ઝાઝું, વાંચન કરતાં વાતું :
અવ્વલ આવે કેમ કલાસમાં, હવે મને સમજાતું!
ભૂલ બતાવે, ઠપકો આપે, ધમકી દે વઢવાની :
હું છું તારા નાના કે ભૈ તું છે મારી નાની!!
સંતાનોનું યૌવન, એનાં સંતાનોનું બચપણ :
ત્રણે અવસ્થાની સરિતાનો સંગમ – તીરથ ઘડપણ!