કરું પ્રભાતે `कर-दर्शनम्’ ને
ક્ષ્મામા-ક્ષમા લૈ કરું `पाद-स्पर्शम्’
ન્હાતાં ભજું પાવન કૈં નદીઓ,
`એ પૂર્ણ, આ પૂર્ણ’, અપૂર્ણ પૂર્ણ
પવિત્ર બેસું પ્રભુ-પ્રાર્થનામાં!
`માતા-પિતા-બંધુ-સખા-શ્રી-વિદ્યા
તે જ હે દેવ!’ પરં પ્રયત્ન :
`સુખાવસાનેય દુઃખાવસાને’
`સત્, જ્યોતિ ને અમૃત ગમ્ય’ યત્ન;
`હરિ ૐ’ કહું ને વળી `જય શ્રીકૃષ્ણ’!
`હોજો સુખી સર્વ નિરામયાત્રે’,
નિમંત્રું `વૈશ્વાનર અન્નપાત્રે’,
`આવાસ્ય આ સર્વ’ સ્વયં સજાવે,
`જેની કૃપાથી ગિરિ પંગુ લંઘે’,
`જેના ગુણોનો નહિ પાર આવે
એ ઈશ’ બીડે મુજ નેત્ર રાત્રે! …
મધ્યે જ તો ખંડિત કેમ નિદ્રા?
આ ભાર હૈયા પર, આ અનિદ્રા!
દે સાંત્વના વ્યર્થ જ ચંદ્ર-તારા,
સંપૂર્ણ ઘૂમી પ્રભુ-નામમાળા;
`प्रचोदयात्’ પંક-પ્રબોધ-પદ્મમ્,
કરો કૃપા `तत्सवितुर्वरेण्यम्’!…
સૂર્ય :
“सेव्यम् सुखम् आपतितम् सदैव,
सेव्यम् दु:खम् आपतितम् तथैव–
ફરંત આજીવન ચક્રવત્ જે.”…
એ ચક્રમાં આગળ કોણ, કયારે?
રહે વિના ઉત્તર એ જ પ્રશ્ન;
`હરિ ૐ’ રટું ને વળી `જય શ્રીકૃષ્ણ’!
દુઃખી જરા હું નિજ સૌ દુઃખોથી;
વધુ દુઃખી અન્ય તણાં સુખોથી!
સુખી જરા હું નિજ સૌ સુખોથી;
વધુ સુખી અન્ય તણાં દુઃખોથી!
`अस्मि’ત્વ ઉદ્વેગ અશાંતિ આપે,
`असि’ત્વ આનંદિત ચિત્ત રાખે,
`अस्ति’ત્વને `तत्त्वमसि’ત્વ વચ્ચે
અસ્તિત્વના અંબરમાં રવીંદુ :
બંને દ્રવે અદ્ભુત અશ્રુબિંદુ!
આ સૌખ્ય એ તો દુઃખ કૈંક ઓછું,
ને દુઃખ એ સૌખ્ય ભલે નજીવું,
હસું, રડાવે સહસા હસાવે,
સંસારમાં સાર-અસાર લાવે,
આ પાર, એ પાર, ન પાર આવે –
અન્યોન્યમાં દ્રાવ્ય બની બનાવે
દિવ્યામી…ઈશે પણ એ જ પીવું!
આજન્મજન્માંતર શીત-ઉષ્ણ :
`હરિ ૐ’ કહું ને કહું `જય શ્રીકૃષ્ણ’!
Hari Om🙏🏻🌹🙏🏻Jai shree Krishna 🙏🏻🌹🙏🏻